ପଶ୍ଚିମ ଓଡ଼ିଶାରେ ଓଡ଼ିଆ ହାଇକୋର୍ଟର ସର୍କିଟ୍ ବେଞ୍ଚ ସ୍ଥାପନ ତଥା ନିମ୍ନ ତଥା ଉଚ୍ଚ ଅଦାଲତରେ ଆଞ୍ଚଳିକ ଭାଷାର ବ୍ୟବହାର କରାଯାଉ । ଓଡ଼ିଶା ହାଇକୋର୍ଟ ତଥା ରାଜ୍ୟର ନିମ୍ନ ଅଦାଲତଗୁଡ଼ିକରେ ଓଡ଼ିଆ ଭାଷାରେ ଜବାବ ସୁଆଲ ବ୍ୟବସ୍ଥା କରିବାକୁ ଆଜି ଲୋକସଭାରେ ବରଗଡ଼ ସାଂସଦ ପ୍ରଦୀପ ପୁରୋହିତ ଦାବି କରିଛନ୍ତି । ପଶ୍ଚିମ ଓଡ଼ିଶାରେ ହାଇକୋର୍ଟର ବେଞ୍ଚ ନଥିବାରୁ ସ୍ଥାନୀୟ ଲୋକ କଟକ ଆସି ହଇରାଣ ଓ ଖର୍ଚ୍ଚାନ୍ତ ହେଉଥିବାରୁ ଏହି ଅଞ୍ଚଳର କୌଣସି ସ୍ଥାନରେ ବେଞ୍ଚ ସ୍ଥାପନ କରାଯାଉ ବୋଲି ଦର୍ଶାଇଛନ୍ତି । ସେହିପରି ସାଧାରଣଲୋକଙ୍କୁ ସରଳ ଓ ସହଜ ନ୍ୟାୟିକ ସୁବିଧା ଯୋଗାଇଦେବାକୁ ସେ ଓଡ଼ିଆ ଭାଷାର ବ୍ୟବହାର କରିବାକୁ ଦାବି ଉଠାଇଛନ୍ତି । ଏହାର ଜବାବରେ କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘଓ୍ବାଲ୍ କହିଛନ୍ତି ଯେ, ସମ୍ବିଧାନର ଧାରା 348 ଅନୁସାରେ, ସୁପ୍ରିମକୋର୍ଟ ତଥା ଦେଶର ହାଇକୋର୍ଟଗୁଡ଼ିକରେ ଇଂରାଜୀ ଭାଷାର ପ୍ରୟୋଗ କରାଯାଉଛି । ତେବେ 348 (ଖ) ଧାରା ଅନୁସାରେ, ରାଷ୍ଟ୍ରପତିଙ୍କ ଅନୁମୋଦନକ୍ରମେ ସଂପୃକ୍ତ ରାଜ୍ୟର ରାଜ୍ୟପାଳ ତାଙ୍କ ରାଜ୍ୟରେ ଅଧିକରୁ ଅଧିକ ଆଞ୍ଚଳିକ ଭାଷାର ବ୍ୟବହାର ପାଇଁ ନିର୍ଦ୍ଦେଶ ଦେଇପାରିବେ । ଏହି ଧାରା ଅନୁସାରେ, 1985 ମସିହାରୁ ରାଜସ୍ଥାନ ହାଇକୋର୍ଟରେ, 1969ରୁ ଉତ୍ତର ପ୍ରଦେଶରେ, 1971ରୁ ମଧ୍ୟପ୍ରଦେଶ ଓ 1972ରୁ ବିହାର ହାଇକୋର୍ଟରେ ଜବାବ ସୁଆଲ ବେଳେ ଅଧିକରୁ ଅଧିକ ହିନ୍ଦୀ ଭାଷାର ପ୍ରୟୋଗ କରାଯାଉଥିବା ଆଇନ ମନ୍ତ୍ରୀ ଗୃହରେ ସୂଚନା ଦେଇଛନ୍ତି ।
